:اسلام آباد،۴ دسمبر 2023 (جی این پی)
حکومت قازقستان اور کامسٹیک کے زیر اہتمام مشترکہ طور پر “خلا کو پر کرنا: محفوظ مستقبل کے لیے بایو سیفٹی اور بایو سیکیوریٹی رجیم کو بڑھانا ” کے عنوان سے ایک بین الاقوامی ورکشاپ کا افتتاح کامسٹیک سیکرٹریٹ میں کیا گیا۔ کامسٹیک او آئی سی کی قائمہ کمیٹی برائے سائنسی اور تکنیکی تعاون ہے اور اس کی میزبانی پاکستان کررہا ہے۔
ورکشاپ میں مصر، جارجیا، اردن، قازقستان، ملائیشیا، نائیجیریا، پاکستان، یوگنڈا اور ازبکستان کے ماہرین کی ایک بڑی تعداد کو اکٹھا کیا گیا ہے تاکہ حیاتیاتی سائنس میں ہونے والی ترقیوں اور قدرتی طور پر رونما ہونے والے عالمی واقعات جیسے کہ کووڈ عالمی وباء ، انسانی سلامتی کو درپیش چیلنجز پر تبادلہ خیال کیا جا سکے. ماہرین حیاتیاتی ہتھیاروں کے کنونشن، حیاتیاتی تحفظ کو یقینی بنانے کے لیے موجودہ پالیسی ، سازوسامان اور پروٹوکول، اور مکمل نفاذ کے لیے ان کی حدود اور رکاوٹوں پر بھی غور و فکر کریں گے۔
خاص طور پر، ورکشاپ میں قازقستان کے صدر کی طرف سے اقوام متحدہ میں 2020 میں ایک بین الاقوامی ایجنسی برائے حیاتیاتی تحفظ کے قیام کے لیے شروع کی گئی تجویز کا جائزہ لیا جائے گا اور موجودہ معاہدوں کے تحت اس کے عملی نفاذ کے لیے طریقے اور ذرائع تجویز کیے جائیں گے۔
مزید پڑھیں: چینی سفیر کی وزیر تجارت و صنعت سے ملاقات
افتتاحی سیشن سے کامسٹیک کے کوآرڈینیٹر جنرل پروفیسر ڈاکٹر محمد اقبال چوہدری ، قازقستان کے سفیر مسٹر یرژان کِسٹافن؛ او آئی سی جنرل سیکرٹریٹ کے نمائندے، مسٹر ارمان ٹائنی بیک؛ ورکشاپ ٹیکنیکل کمیٹی کے چیئرمین پروفیسر ڈاکٹر ضابطہ خان شنواری اور ورکشاپ کے فوکل پرسن پروفیسر ڈاکٹر ایس خورشید حسنین نے خطاب کیا۔
مقررین نے بائیو سیکیورٹی اور بائیو سیفٹی کے ابھرتے ہوئے خطرات کے تناظر میں قازقستان کے اقدام کی فوری اور بروقت نوعیت پر روشنی ڈالی، اور ورکشاپ کے پس منظر اور سائنس اور ٹیکنالوجی کے مختلف شعبوں میں کامسٹیک اور قازقستان کے درمیان جاری تعاون کے بارے میں تفصیل سے بتایا۔
بقیہ دن تین تکنیکی سیشنز کے لیے مختص ہوں گے جہاں ملکی ماہرین بائیو سیفٹی اور بائیو سیکیوریٹی کو بڑھانے کے لیے درکار اقدامات اور اس ڈومین میں موجود مختلف معاہدوں اور کنونشنز کی جانچ کے بارے میں اپنے تجربات اور مشاہدات کا اشتراک کریں گے۔ ورکشاپ 4 دسمبر کو اختتام پذیر ہوگی اور ورکشاپ کے نتائج کی دستاویز کو او آئی سی کے ساتھ غور اور فالو اپ اقدامات کے لیے شیئر کیا جائے گا۔
