یومِ سیاہ کشمیر پر کینیڈا میں پاکستان کے ہائی کمیشن اوٹاوا اور ٹورنٹو، مونٹریال اور وینکوور میں قائم قونصلیٹ جنرلز میں تقریبات کا انعقاد

اوٹاوا: کینیڈا میں پاکستان کے ہائی کمیشن اوٹاوا اور ٹورنٹو، مونٹریال اور وینکوور میں قائم قونصلیٹ جنرلز نے آج "یومِ سیاہ کشمیر” کے موقع پر تقریبات کا اہتمام کیا۔ ان تقریبات کا مقصد بھارت کے غیر قانونی زیرِ تسلط جموں و کشمیر (آئی آئی او جے کے) کے ان عوام کے ساتھ یکجہتی اور حمایت کا اظہار کرنا تھا، جو اپنے ناقابلِ تنسیخ حق اور جائز خودارادیت کے حصول کے لیے ایک جائز جدوجہد کر رہے ہیں۔

ہائی کمیشن میں منعقدہ اس پروقار تقریب میں دستاویزی فلم کی نمائش، تصویری نمائش اور انسانی حقوق کے حامیوں کی جانب سے اظہارِ خیال شامل تھا۔ ان تقریبات کے دوران مقررین نے مسئلہ کشمیر اور بھارتی قابض افواج کے ہاتھوں مقبوضہ کشمیر کے معصوم شہریوں کو درپیش غیر انسانی مظالم کو اجاگر کیا۔

"یومِ سیاہ کشمیر” کے موقع پر صدرِ پاکستان، وزیرِ اعظم اور نائب وزیرِ اعظم / وزیرِ خارجہ کے خصوصی پیغامات پڑھ کر سنائے گئے۔ ان پیغامات میں حکومتِ پاکستان کی جانب سے مقبوضہ کشمیر کے عوام کے لیے غیر متزلزل اور مسلسل سفارتی، سیاسی اور اخلاقی حمایت کا اعادہ کیا گیا، جو اقوامِ متحدہ کی سلامتی کونسل کی متعلقہ قراردادوں کے مطابق ان کے حقِ خودارادیت کے حصول تک جاری رہے گی۔

یہ بھی پڑھیں: کینیڈا کے شہر اوٹاوا میں پاکستان کا 80 واں یومِ آزادی اور قائدِ اعظم محمد علی جناح کی 150 ویں سالگرہ منائی گئی

کینیڈا میں پاکستان کے ہائی کمشنر محمد سلیم نے تقریب کے شرکاء سے خطاب کرتے ہوئے اس بات پر زور دیا کہ مسئلہ جموں و کشمیر اقوامِ متحدہ کی سلامتی کونسل کے ایجنڈے پر موجود سب سے پرانے اور حل طلب مسائل میں سے ایک ہے۔ انہوں نے عالمی برادری، انسانی حقوق کی تنظیموں اور سول سوسائٹی کے اداروں سے اپیل کی کہ وہ مقبوضہ کشمیر میں انسانی حقوق کی خلاف ورزیوں کی مذمت کریں اور تنازعہ مقبوضہ جموں و کشمیر کے منصفانہ اور پرامن حل کے لیے اپنا کردار ادا کریں۔

"یومِ سیاہ کشمیر” منانے کا مقصد 27 اکتوبر 1947 سے بھارت کی جانب سے جموں و کشمیر پر کیے گئے اس غیر قانونی قبضے کی مذمت کرنا ہے، جو وہاں کے عوام کی مرضی اور امنگوں کے سراسر منافی ہے۔

کشمیر بارے یومِ سیاہ کی تقریب تنازعہ کشمیر کو اجاگر کرنے اور بھارتی غیر قانونی زیرِ تسلط جموں و کشمیر کے لوگوں کے ساتھ اس وقت تک غیر متزلزل یکجہتی کا اظہار کرنے کے پاکستان کے پختہ عزم کا اعادہ کرتی ہے، جب تک کہ کشمیریوں کے حقِ خودارادیت کی جائز امنگوں کو پورا نہیں کیا جاتا۔