پارلیمنٹ لاجز کی حالتِ زار پر اظہارِ تشویش، فوری اصلاحات اور ماہانہ نگرانی کی سفارش
اسلام آباد : ڈپٹی چیئرمین سینیٹ سیدال خان کی زیر صدارت سینیٹ ہاؤس کمیٹی کا اجلاس پارلیمنٹ ہاؤس میں منعقد ہوا۔ کمیٹی اجلاس میں پارلیمنٹ لاجز کی مجموعی صورتحال، بنیادی سہولیات، مرمت و بحالی کے امور، اور 104 نئے سوئٹس کی تعمیر جیسے اہم معاملات کا تفصیل سے جائزہ لیا گیا۔
کمیٹی نے پارلیمنٹ لاجز کی ناقص حالت، بالخصوص صفائی ستھرائی، دیکھ بھال کے فقدان اور روزمرہ سہولیات کی کمی پر گہری تشویش کا اظہار کیا۔ سینیٹر پونجو بھیل نے نشاندہی کی کہ ارکان پارلیمنٹ کو معمولی ضروریات، جیسے بلب کی تبدیلی، کے لیے بھی دشواریوں کا سامنا ہے، جو انتظامی نااہلی کی عکاسی کرتا ہے۔
اجلاس میں سینیٹر کامل علی آغا نے لاجز میں تعینات سی ڈی اے افسران کے غیر سنجیدہ اور غیر پیشہ ورانہ رویے پر شدید تحفظات کا اظہار کیا اور کہا کہ ارکان پارلیمنٹ کے ساتھ ایسا برتاؤ ہرگز قابلِ قبول نہیں۔ سینیٹر خلیل طاہر سندھو نے سابق الاٹیز کی جانب سے بجلی کے واجبات کی عدم ادائیگی کا مسئلہ اٹھایا اور مطالبہ کیا کہ سی ڈی اے ان واجبات کی فوری وصولی یقینی بنائے۔
وزیر مملکت برائے داخلہ سینیٹر طلال چوہدری نے کمیٹی کو یقین دلایا کہ وزارتِ داخلہ وزیراعظم شہباز شریف کی ہدایات اور اسپیکر قومی اسمبلی کی مشاورت سے پارلیمنٹ لاجز میں اصلاحات کے لیے ہنگامی بنیادوں پر اقدامات کر رہی ہے۔ انہوں نے کہا کہ 104 نئے سوئٹس کی تعمیر اور دیگر مسائل کے حل کے لیے ٹھوس حکمتِ عملی اختیار کی گئی ہے۔
وزارتِ خزانہ کے حکام نے بتایا کہ مالی سال 2025-26 میں پارلیمنٹ لاجز کی مرمت و دیکھ بھال کے لیے خاطر خواہ فنڈز مختص کیے گئے ہیں، تاہم سی ڈی اے حکام کے مطابق گزشتہ دو سال کے واجبات کی ادائیگی میں تاخیر سے مرمتی کاموں میں رکاوٹ پیش آ رہی ہے۔
کمیٹی اجلاس میں فیصلہ کیا گیا کہ پارلیمنٹ لاجز کے تمام امور کی مؤثر نگرانی کے لیے سینیٹ ہاؤس کمیٹی کے اجلاس ہر ماہ باقاعدگی سے منعقد کیے جائیں گے۔ کمیٹی نے سینیٹ فنانس کمیٹی کی تجاویز کی روشنی میں سفارش کی کہ مرمت و دیکھ بھال کے لیے دیانتدار اور متحرک سی ڈی اے عملہ تعینات کیا جائے، جبکہ غیر مؤثر اور طویل عرصے سے تعینات عملے کو فوری طور پر تبدیل کیا جائے۔
کمیٹی نے سابق ارکان کی جانب سے لاجز پر غیر قانونی قبضوں کا سختی سے نوٹس لیتے ہوئے ان رہائش گاہوں کو فی الفور خالی کروانے کی سفارش کی۔ کمیٹی نے اس امر پر بھی زور دیا کہ خواتین ارکان پارلیمنٹ کو دیے گئے لاجز کی مرمت و دیکھ بھال کو ترجیحی بنیادوں پر یقینی بنایا جائے۔
اجلاس میں سینیٹرز جان محمد، کامل علی آغا، پونجو بھیل، خلیل طاہر سندھو، وزیر مملکت برائے داخلہ سینیٹر طلال چوہدری، اسپیشل سیکریٹری داخلہ وقاص علی محمود، اور وزارتِ خزانہ و قانون کے اعلیٰ حکام نے شرکت کی۔
Sohail Majeed is a Special Correspondent at The Diplomatic Insight. He has twelve plus years of experience in journalism & reporting. He covers International Affairs, Diplomacy, UN, Sports, Climate Change, Economy, Technology, and Health.
