لاہور۔ : چیئرمین وزیر اعظم یوتھ پروگرام رانا مشہود احمد خاں نے کہا ہے کہ یونیورسٹیوں میں طلبہ کیلئے گرین یوتھ موومنٹ کلبز قائم کئے جائیں گے،حکومت نے ماحولیاتی تحفظ کیلئے متعدد اقدامات اٹھائے،موسمیاتی چیلنجز سے ملکر نمٹنا ہے،گرین ہائوسز گیسز کے اخراج میں پاکستان کا حصہ انتہائی معمولی ہے۔ان خیالات کا اظہار انہوں نے لاہور کالج فار وویمن یونیورسٹی اور یو سی پی میں تقاریب سے خطاب کرتے ہو ئے کیا۔رانا مشہود احمد خاں نے کہا کہ وزیر اعظم محمد شہباز شریف نوجوان نسل کو تر قی کی راہ پر گامزن کرنے کیلئے ہمیشہ پر عزم رہے،مسلم لیگ ن کے دور حکومت میں پنجاب کے اندر 5 یونیورسٹیاں بنیں اور یوتھ فیسٹیولز کا آغاز بھی ہمارے دور میں ہوا،وزیر اعظم پروگرام کے تحت یونیورسٹیوں کے اندر گرین یوتھ موومنٹ کلبز کا قیام عمل میں لایا جا رہا ہے تاکہ طلبہ کلائمیٹ چینج پر ریسرچ کا کام کریں کیونکہ باہر سے آکر کسی نے ہمارے مسائل کو حل نہیں کرنا بلکہ موسمیاتی تبدیلیوں سے نمٹنے کیلئے ہمیں خود لائحہ عمل اختیار کرنا ہو گا،گرین ہائوسز گیسز کے اخراج میں پاکستان کا حصہ انتہائی معمولی ہے۔انہوں نے کہا کہ وزیر اعظم یوتھ پروگرام کے نوجوانوں کو حکومتی موقف دنیا کے سامنے رکھنا چاہیے،ڈبلیو ڈبلیو ایف جس کے انٹرنیشنل تعلقات ہیں اس سے پاکستان کا موقف دنیا کے سامنے رکھنے کیلئے اپیل کریں گے۔انہوں نے کہا کہ گرین یوتھ موومنٹ کے ساتھ پاکستان کی سب سے بڑی نیشنل والنٹیئر کور قائم کی جا رہی ہے جو قدرتی آفات سے بچائوکیلئے حکومتی اداروں کے ساتھ مل کر لوگوں کو مصیبت سے نکالنے میں مددگار ثابت ہو گی،اس کی مثال ماضی میں ترکی میں زلزلے اور چین میں آنے والے سیلاب میں دیکھی جا سکتی ہے کہ زلزلہ متاثرین کی امداد کیلئے حکومت کی امدادی ٹیمیں بعد میں پہنچیں جبکہ والنٹیئرز پہلے پہنچ گئے تھے،جس کی وجہ سے انسانی جانوں کا ضیاع کم سے کم ہوا۔رانا مشہود نے کہا کہ وزیر اعظم محمد شہباز شریف نے والنٹیئرزکور میں سب سے پہلے اپنے آپ کو رجسٹر کروایا،نیشنل والنٹیئر کور کا آغاز دو لاکھ بچے بچیوں کی تعداد سے کیا لیکن وزیر اعظم نے کہا ہے کہ پاکستان میں موجودہ حالات کو مد نظر رکھتے ہو ئے اگلے تین سال میں بیس لاکھ بچے بچیوں کو نیشنل والنٹیئرز کور میں شامل کیا جائے گا۔انہوں نے کہا کہ پاکستان کو آج جن موسمیاتی تبدیلیوں کی وجہ سے مسائل درپیش ہیں اور علاقے میں جو تباہی ہو رہی ہے، گلیشیئرز پگھل رہے ہیں اس میں پاکستان کا صفر کردار ہے،جن ممالک کی وجہ سے یہ ہورہا ہے، انہیں اپنے ممالک میں ہائوس ان آڈرز کرنے کی ضرورت ہے ،پاکستان کا دنیا کے ممالک سے ایڈ نہیں بلکہ ٹریڈ کرنا موجودہ حکومت کی اولین ترجیح ہے۔انہوں نے کہا کہ ملک میں بالخصوص صوبائی دارالحکومت لاہور میں سموگ پر قابو پانے کیلئے اقدامات کا آغاز کردیا ہے،امید ہے آنے والے سالوں میں پاکستان اس مسئلے سے نجات حاصل کر لے گا۔انہوں نے کہا کہ2008 میں بطور وزیر اعلی محمد شہباز شریف نے یوتھ کو آگے بڑھنے کیلئے مختلف مواقع فراہم کئے،لیپ ٹاپس،سکالر شپس، آئی ٹی، فری لانسنگ، ای کامرس اور روز گار کی سکیموں کا آغاز کیا جس سے نوجوانوں نے بھر پور استفادہ حاصل کیا اور ملک وقوم کا نام روشن کیا ۔
Sohail Majeed is a Special Correspondent at The Diplomatic Insight. He has twelve plus years of experience in journalism & reporting. He covers International Affairs, Diplomacy, UN, Sports, Climate Change, Economy, Technology, and Health.
