اسلام آباد: وفاقی وزیر برائے قومی غذائی تحفظ و تحقیق رانا تنویر حسین نے قومی اسمبلی کے اجلاس میں اپنے خطاب کے دوران واضح الفاظ میں بھارت کو خبردار کرتے ہوئے کہا ہے کہ اگر بھارت اپنی جارحانہ حرکتوں سے باز نہ آیا تو پاکستان وہ جواب دے گا کہ پوری دنیا دیکھے گی۔ انہوں نے کہا کہ پاکستان ایک امن پسند ملک ہے، لیکن اس امن پسندی کو ہماری کمزوری ہرگز نہ سمجھا جائے۔
وفاقی وزیر نے مزید کہا کہ بھارتی ڈرون کے حوالے سے افواہیں بے بنیاد ہیں۔ الحمدللہ، اس واقعے سے پاکستان کو کوئی جانی نقصان نہیں ہوا، بلکہ عوام اس صورتحال کو حوصلے اور عزم کے ساتھ دیکھ رہے ہیں۔ پوری قوم اپنی بہادر افواج کے ساتھ کھڑی ہے اور ملک کی سرحدوں کی ہمہ وقت نگرانی کی جا رہی ہے۔
رانا تنویر حسین نے اس موقع پر بھارت کے اندرونی حالات پر تبصرہ کرتے ہوئے کہا کہ بھارت کی بوکھلاہٹ عیاں ہے۔ بھارتی حکومت اپنی افواج کے ناکام عزائم پر پردہ ڈالنے کی کوشش کر رہی ہے، جس کے نتیجے میں انڈیا میں جاری کرکٹ لیگ کو معطل کر دیا گیا ہے اور اہم ہوائی اڈوں کو بھی بند کر دیا گیا ہے۔ یہ اقدامات بھارت کی اندرونی خلفشار اور خوف کا واضح ثبوت ہیں۔
انہوں نے کہا کہ اس کے برعکس پاکستان میں امن و امان برقرار ہے۔ تمام ایئرپورٹس اور فضائی پروازیں معمول کے مطابق جاری ہیں۔ ملک کے تمام بڑے شہر اور مارکیٹیں بھی کھلی ہیں، جو اس بات کا ثبوت ہے کہ پاکستانی قوم پُرعزم اور پُراعتماد ہے۔
رانا تنویر حسین نے کہا کہ پاکستان میں اقلیتوں کو مکمل مذہبی آزادی حاصل ہے، اور ریاست اقلیتوں کے مقدس مقامات جیسے مندروں اور گردواروں کی حفاظت کے لیے پُرعزم ہے۔ انہوں نے کہا کہ ہمیں اپنی افواج کی صلاحیتوں پر مکمل بھروسہ اور فخر ہے، اور ہم کسی بھی جارحیت کا بھرپور جواب دینے کے لیے تیار ہیں۔
آخر میں وفاقی وزیر نے کہا کہ بھارت کو ہوش کے ناخن لینے چاہئیں اور خطے کے امن کو داؤ پر نہ لگائے۔ پاکستان کی امن کی خواہش کو کمزوری نہ سمجھا جائے، کیونکہ ملکی دفاع اور سلامتی کے لیے قوم اور افواج پاکستان ہر لمحہ تیار ہیں۔
Sohail Majeed is a Special Correspondent at The Diplomatic Insight. He has twelve plus years of experience in journalism & reporting. He covers International Affairs, Diplomacy, UN, Sports, Climate Change, Economy, Technology, and Health.
