اسلام آباد : پاکستان آج دنیا کے ساتھ ہم آواز ہو کر دہشت گردی کے شکار اور اس کے متاثرین سے اظہار یکجہتی کرتا ہے۔
دہشت گردی کے متاثرین سے اظہار یکجہتی پاکستان کے پر خلوص قومی جذبات کی عکاس ہے۔
پاکستان دنیا کا وہ واحد ملک ہے جس کے ہر عمر کے شہری، مسلح افواج، قانون نافذ کرنے والے اداروں نےصف اول میں رہتے ہوۓ اس برائی کے خلاف جنگ کی ہے۔ دہشت گردی کے ناسور کو پاکستان نے بحیثیت قوم بڑی بہادری، عزم و ہمت اور قربانیاں دے کر شکست دی ہے۔ دہشت گرد اور دہشت گردی کے واقعات پاکستان کی قومی غیرت و حمیت اور ہمارے امن و خوشحالی کے عزم کو اللہ کے فضل و کرم سے پسپا نہیں کر سکے۔
پاکستان نے دہشت گردی کے خلاف عالمی جنگ میں ہراول دستے کا کردار ادا کرتے ہوئے نہ صرف 90 ہزار قیمتی جانوں کا نذرانہ پیش کیا بلکہ ہماری ملکی معیشت کو بھی خاطر خواہ نقصان کا اٹھانا پڑا۔ پاکستان کے طول و عرض میں ہر شہر ہر بستی میں کوئی نہ کوئی شاہراہ، بازار اور سکول دہشت گردی کے واقعات اور متاثرین کی روداد سناتی ہیں۔
جہاں دہشت گردی کا شکار پاکستانی معاشرہ اپنی قربانیوں اور مصائب پر افسردہ ہے، وہیں اپنی بہادری اور شجاعت کی داستانوں پر فخر سے سر بلند بھی ہے۔
پاکستان کی نوجوان نسل اس عزم کے ساتھ پروان چڑھ رہی ہے کہ ملکی سلامتی اور قومی اقدار کی حفاظت ہر شہری کا اہم قومی فریضہ ہے۔
حکومت پاکستان، صوبائی حکومتیں, تمام شہری، قانون نافذ کرنے والے اور انٹیلیجنس اداروں، پولیس اور مسلح افواج کے ساتھ کمر بستہ ہو کر اس برائی کو جڑ سے ختم کرنے کے لیے کوشاں ہیں.
پاکستان نے کامیابی سے آپریشن ضرب عضب, آپریشن رد الفساد اور بے شمار انٹیلیجنس بیسڈ آپریشنز کے ذریعے دہشت گردوں کے عزائم کو شکست فاش دی ہے۔
پاکستان کے سول اور ملٹری انٹیلیجنس اداروں نے پیشہ ورانہ مہارت کو بروئے کار لاتے ہوئے ملک عزیز کو بے شمار دہشت گردی کے واقعات سے بچایا ہے۔ آج ہم بحیثیت قوم جہاں دہشت گردی کے شکار متاثرین اور شہداء کو سلام پیش کرتے ہیں، وہیں دہشت گردی سے نبرد آزما اداروں کو لائق صد تحسین سمجھتے ہیں۔
نیشنل ایکشن پلان (NAP) دہشت گردی کے خلاف ہماری جامع حکمت عملی کا بہترین عکاس ہے۔ یہ پلان نہ صرف دہشت گردی کو زمینی مسلح آپریشنز بلکہ، دیگر اقدامات جن میں شدت پسندی کے خلاف نظریاتی، انتظامی، ادارہ جاتی اور بیانیہ کے محاذ پر بھی مربوط حکمت عملی کو بیان کرتا ہے۔
دہشت گردی کے خلاف جنگ میں قومی اتحاد و یگانگت اور یکسوئی پاکستان میں امن وسلامتی، ترقی وخوشحالی اور روشن مستقبل کی ضمانت ہے۔
Sohail Majeed is a Special Correspondent at The Diplomatic Insight. He has twelve plus years of experience in journalism & reporting. He covers International Affairs, Diplomacy, UN, Sports, Climate Change, Economy, Technology, and Health.
