یونیورسٹی آمد پر صدر جامعہ کا پرتپاک استقبال کیا گیا
اسلام آباد: پروفیسر ڈاکٹر احمد سعد الاحمد نے بین الاقوامی اسلامی یونیورسٹی اسلام آباد کے صدر کے عہدے کا چارج سنبھال لیا۔
پروفیسر ڈاکٹر احمد سعد الاحمد نے پیر کو بین الاقوامی اسلامی یونیورسٹی اسلام آباد کے صدر کی ذمہ داریاں باضابطہ طور پر سنبھال لیں جہاں نیو کیمپس پہنچنے پر پروفیسر ڈاکٹر احمد کا یونیورسٹی کے ریکٹر پروفیسر ڈاکٹر مختار احمد نے نائب صدور پروفیسر ڈاکٹر احمد شجاع سید اور پروفیسر ڈاکٹر عبدالرحمن کے ہمراہ پرتپاک استقبال کیا۔ استقبالیہ میں ڈینز، ڈائریکٹر جنرل، ڈائریکٹرز، فیمیل کیمپس کی انچارج، اور انچارج پروٹوکول اور تعلقات عامہ بھی شامل تھے۔
پروفیسر ڈاکٹر احمد سعد نے ریکٹر کے ساتھ ان کے دفتر میں ون آن ون ملاقات کی، جس کے دوران انہوں نے ادارہ جاتی ترقی، تعلیمی معیار کی بہتری، طلباء پر مرکوز اقدامات اور یونیورسٹی کے بین الاقوامی مقام سے متعلق اہم امور پر تبادلہ خیال کیا۔ قبل ازیں پروفیسر ڈاکٹر احمد شجاع سید نے باضابطہ طور پر پروفیسر ڈاکٹر احمد کو چارج سونپا اور اس موقع پر جامعہ کی مستقبل کی ترقی کے لیے اجتماعی دعا کی گئی۔
بعد ازاں صدر جامعہ کے اعزاز میں ایک استقبالیہ دیا گیا جہاں ریکٹر پروفیسر ڈاکٹر مختار احمد نے ٹیم ورک اور اتحاد کی اہمیت پر روشنی ڈالی۔ انہوں نے کہا یہ دن ایک اہم سنگ میل ہے کیونکہ آج ہمارے پاس اب ایک نئے صدر جامعہ کی صورت میں اس ادارے کو بہتری کی طرف لاجانے والا ایک لیڈر موجود ہے۔ انہوں نے یونیورسٹی کمیونٹی کو مخاطب کرتے ہوے پیشہ ورانہ مہارت اور اتحاد کے ساتھ کام کرنے پر زور دیا۔ ریکٹر نے جامعہ کے ساتھ مسلسل تعاون پر سعودی عرب کا شکریہ ادا کیا اور خاص طور پر امام محمد ابن سعود اسلامی یونیورسٹی کے تعاون کا بھی ذکر کیا۔
اپنے خطاب میں پروفیسر ڈاکٹر احمد سعد الاحمد نے پرتپاک استقبال پر ریکٹر اور یونیورسٹی حکام کا شکریہ ادا کیا اور یونیورسٹی کے مشن کے ساتھ اپنی وابستگی کا اظہار کیا۔ انہوں نے کہا کہ اسلام ہمیں ایک قوم کے طور پر متحد کرتا ہے ۔ انہوں نے مزید کہا کہ اس جامعہ کے دروازے طلباء، اساتذہ اور عملے کے لیے کھلے ہیں۔ انہوں نے ریکٹر جامعہ کی طرف سے اجتماعییت کے فروغ اور اختلافات کو بھلانے کی نصیحت کو بھی دوہرایا۔
صدر اور ریکٹر دونوں نے اس بات کا اعادہ کیا کہ طلباء کی فلاح و بہبود اور تعلیمی ترقی یونیورسٹی کے لیے ان کے مشترکہ وژن کا مرکز رہے گی۔
Sohail Majeed is a Special Correspondent at The Diplomatic Insight. He has twelve plus years of experience in journalism & reporting. He covers International Affairs, Diplomacy, UN, Sports, Climate Change, Economy, Technology, and Health.
